Ruina Schiedberg
La ruina Schiedberg sauda tier il loghens historics il pli impurtonts el Grischun. La muntada dalla ruina da Schiedberg ei vegnida enconuschenta pér cullas excavaziuns archeologicas dils onns 1964-1968. El 12avel tschentaner havevan ils signurs da Sagogn construiu in edifeci monumental cun in ferm mir circular. Il crest dominant ei situaus sper la via veglia sursilvana ch`ei stada duront melli onns ina ruta da transit fetg impurtonta.
Il casti vegneva probabel destruius duront la uiara da 1352, denter ils Signurs da Belmont ed ils signurs Werdenberg.
Text: Platta Pussenta-Projekt, Dr. Martin Bundi
Ruinaulta
La Ruinaulta sauda tier ils monuments dalla natira da muntada naziunala. Ina gronda part dil territori da Sagogn cunfinescha e schai ella cavorgia dil Rein. La forza dil Rein anteriur ha magliau duront mellis onns in profund vau el cugn dalla Bova dil Crap da Flem. Sil territori levamein ondulau sur la Ruinaulta prosperescha igl Uaul Grond, el sederasa da Sagogn viers ost ed ei il pli grond uaul compact dil Grischun.
Cuvel
Il cuvel ei ina teuna sper il Rein. Ella schai denter la staziun da Valendau/Sagogn e Castrisch, ella Ruinaulta silla vart da Sagogn. El temps dalla pestilenza veigien cheu 3 famiglias encuretg refugi per scapar dalla infecziun.
Baselgia reformada
La baselgia reformada ei vegnida baghegiada el onn 1743. Per Las preparativas dil baghetg eran Jakob Casutt e Ludwig Castell responsabels. Igl ei in sempel baghetg cun in spitg en fuorma da tschaguola.
Platta Pussenta, Runcal
La platta da crap muossa sin sia surfatscha pliras restonzas da cuppas artificialas. Ei setracta probablamein da cups (scaluttas) construi d`in pievel pagaun preroman (ev. dils Rets) per purtar cheu unfrendas a ses Dieus. Il crap ha survegniu il num “Platta Pussenta”.
El decuors dil temps ei quei num vegnius transferius sin in crap cun enzennas ca. 500m nord-ost, nua che las quarter vischnauncas da Schluein, Sagogn, Laax e Falera cunfineschan. Lez punct schai direct sper la via veglia sursilvana. Ina sort megalit cun incisiuns sesanfla pli agl ost dil crap da cunfin intschess da Laax.
Alla Platta Pussenta serefereschan diversas getgas. In proverbi secloma: “Platta Pussenta, Cresta Munteina e Pézza Mundaun valan pli che Brescia e Milaun.
Sper il punct dalla Platta Pussenta secruschan duas vias historicas: il vegl stradun principal dalla Surselva da Laax a Schluein (duvraus tochen el 19avel tschentaner) e la via da communicaziun da Sagogn sur Plaun Larisch-Runcal-Gonda a Falera.
Text: Platta Pussenta-Projekt, Dr. Martin Bundi
Mulin
El liug numnau “Mulin”, sesanflava tochen ca. 1930 in complex da baghetgs industrials. Quels retargevan l`aua da menaschi sur canals ord igl Ual Draus (era numnau Ual da Mulin).
Quels baghetgs schischevan sper la punt e via da communicaziun tier las aclas da Planezzas, Foppa e Tuora, ina via che valeva sco via da transit ella Surselva tochen el temps medieval tardiv ( ca.1390); ella menava da Trin a Pintrun-Conn-Tuora-Mulin-Sagogn-Castrisch tochen a Glion.
Plinanen encunter Spaleun existeva inaga in secund mulin, numnaus Mulin-sura. Digl areal da Mulin anora menava da vart seniastra digl ual in dutg (conduct) aua da schuar giu ellas aclas da Bargaus; restonzas da quell ein aunc veseivlas.
Igl areal da Mulin documentescha ina impurtonta part dalla economia agrara e forestala da pli baul: Moler il graun e resgiar lenna, process tecnics ella elavuraziun dallas duas pli impurtontas materias primas dil temps preindustrial.
Text: Platta Pussenta-Projekt, Dr. Martin Bundi
Baselgia catolica
Tras la renovaziun dalla baselgia, han ins anflau ora che silmeins 4 differentas etappas da baghegiar(cun baselgias pli veglias) sesanflan el liug dad oz. La pli veglia da quellas ei ord il 4/5avel tschentaner. Ils fundaments dalla baselgia ein sur 1500 onns ed ein restai ils medema, quei ei ina raritad ell`Europa. La baselgia da Sagogn era per quei temps remarcabel gronda. Duront la restauraziun han ins anflau in plantschiu da maulta da caltschina ord il temps da 1634-1640.
La baselgia da Nossadunna ha ina bellezia pictura da preit. Quels maletgs ein fatgs da Giovanni Battista Macolino che derivava dalla Val San Giacomo.
Caplutta Sogn Giacun
Il baghetg existent dalla caplutta da S. Giacun datescha da ca. 1503 e fuva oriundamein ina fundaziun d`in Jon Clau Pitschen da Laax che haveva era regalau in zennet ed ornaments. La caplutta ei in sempel baghetg cun arviul e serrada en treis varts. Ella cuntegn in mudest altar cun in maletg da Maria denter S. Giacun e S. Gion. Quei altar fuva in regal dalla famiglia Cabalzar da 1670.
Probablamein existeva gia avon 1500 ina sempla caplutta en quei liug. Il cult da S. Giacun ei sederasaus per propi naven dil temps ault medieval (12/13avel tschentaner) en las regiuns alpinas, specialmein en loghens d`uaul niev-runcai. Quei fatg ei era tipics per Laax ch`ei daventaus pér egl 11/12avel tschentaner in vitget compact.
S. Giacun ei il patrun dils viandonts e pelegrins. La via che meina cheu sperasvi, agl ur dall`immensa ruina digl Ual Draus, ei ina veglia via da communicaziun denter Sagogn e Laax: Via da cuolm e dad alp, mo era „Via da morts“, perquei ch`ils da Laax purtavan tochen 1524 lur morts sil santeri dalla baselgia parochiala a Sagogn.
La „Via da morts“ sco tala sesparta sut la caplutta viers dretg e vegn naven da leu numnada „ Via denter craps“. Ells meina iql`emprem agl ur dils praus cul num Siginina, ina runc senumnava gia 765 „ Secanina“, areal segau.
Text: Platta Pussenta-Projekt, Dr. Martin Bundi
Casti Aspermont
Il casti Aspermont a Sagogn ha ina gronda historia. El renomau testament dad uestg Tello da 765- il emprem document dalla Rezia- eisi scret d`ina „ sala muricia in castro“. Tier historichers eisi en discussiun sch`ei era manegiau la ruina Schiedberg ni il Casti Aspermont che schai sin in plaz el vitg dado. Mussau si ei denton ch`il Casti Aspermont posesseva gia el 13avel tschentaner ina aulta tuor. La casa eleganta cun sala ei vegnida baghegiada 1672 vid la tuor.
Quater famiglias possessuras han influenzau e representau il casti: Ord la emprema – ils Jochbergs – ein resorti renomai enconuschiders dalla Sontga Scartira (surtut Gallus Jochberg). La famigla per statt per il sclariment humanistic dalla Renaschientscha.
Il plascher da viver e representar personificava la famiglia Castelli. Els han enrihiu il casti per biaras attracziuns architectonicas, per exempel il tetg en fuorma da tschaguola ed la remarcabla sala dils giunchers.
La famiglia Castelli ha occupau tut ils pli impurtonts uffecis da lur temps: “Landvogt” da Maienfeld, “Landrichter“ dalla Ligia Grischa e “Podestà“ da Morbegno. Il rebell Gallus, il qual ei seconvertius tier il protestantissem ha caschunau in schoc ella famiglia da noblezia. Il davos Castelli ei morts entuorn igl onn 1840.
Il spért republican dil survetsch alla “Res Publica” han ils Steinhausers representau. In da quels, Anton Steinhauser, ei staus in impurtonrt cusseglier guverantiv e naziunal ed confundatur dalla Viafier retica. Igl fegl Alois Steinhauser ei medemamain staus giurist e confundatur da differentas organisaziuns regiunalas e cantunalas.
Il possessur actual dil casti Aspermont senumna Wolfram Kuoni. Siu bab Andreas haveva surpriu lez dils descendents dalla famiglia Steinhauser ed ha renovau il casti cun agid digl architect Rudolf Olgiati.
Damondas da visetas san ins tschentar a Wolfram Kuoni: Tel. 044 361 00 10.
Bregl da Heida
Excavaziuns archeologicas dapi 1965 han purtau alla glisch ils fundaments d`ina baselgia dil temps medieval tumpriv (7avel tschentaner).
Ei setracta d`ina baselgia-sala el stil carolingic cun apsis (chor) en fuorma da fier-cavagl che vegn identificada cun la baselgia da S. Columban, numnada el testament da Tello 765. S. Columban ei era il patrun-baselgia che figurescha egl uoppen dalla vischnaunca da Sagogn.
Probabel fuva S. Columban ina baselgia privata dalla famiglia pussenta retica dils Victorids che possedevan maneivel da quella, egl intschess da Bregl, lur grond bein signeril, descrets en detgagl el testament da Tello.
Igl extendiu bein signeril cumpigliava sper in baghetg da habitar central e baghetgs d`economia cun conduct d`aua el contuorn vasta orts, curtgins e vegnas. Mirs sutterans che partan dalla baselgia da S. Columban anora laien sminar las dimensiuns da quei bein; pér excavaziuns futuras vegnan a dar sclariment pli exactas.
Text: Projekt Platta Pussenta, Dr. Martin Bundi